A informática e a vida

Descrición

Este obradoiro, proposto para a Universidade de Santiago de Compostela (USC), trata de dar a coñecer os segredos da informática e os ordenadores desde a óptica da vida en dobre sentido. Achegará ó alumnado de entre 9 e 14 anos dous produtos de investigación (programas informáticos), froito da colaboración entre o campo da informática e as ciencias da vida, a bioloxía e a medicina. O alumnado usará os programas CystAnalyser e STERapp, desenvoltos maioritariamente no Centro Singular de Investigación en Tecnoloxías Intelixentes da USC (CiTIUS) para sentirse como unha científica ou un científico nos laboratorios de ciencias da vida.

Partimos da idea de que a informática e os ordenadores (móbil, tableta, ordenador portátil, consola de videoxogos, ordenador portátil ou robot), así como os programas que se executan neles, foron creados polas persoas. Polo tanto, o noso crecemento e experiencias de aprendizaxe foron a fonte de inspiración para o seu deseño. Así, a comparación entre un ordenador (electrodoméstico) co corpo humano e os programas que se executan no ordenador co cerebro ou intelixencia permite introducir o proceso de construcción de programas como un proceso de lóxica e sentido común a partir das experiencias do alumnado. Neste proceso o alumnado deixa de ser expectante dunha caixa luminosa (ordenador) de entretemento, da que descoñece o seu funcionamento interno. Preténdese que o alumnado participe activamente na resolución de problemas na informática coma se tivese o obxetivo de ensinar a outra crianza (por exemplo, un irmán ou unha irmá máis nova) as ferramentas da vida que el ou ela xa dominan, os coñecementos propios da súa idade en matemáticas, linguas ou ciencias sociais e naturais. Isto é posible desde a concepción de que un ordenador é un cerebro en branco (un bebé) que non sabe nada e temos a responsabilidade de irlle ensinando. O alumnado, vendo como resolvería problemas simples, axeitados á súa idade, con lapis e papel, reflexiona sobre como ensinarllo á máquina baleira, que é o ordenador.

A continuación propóñense diferentes actividades que cubren diferentes aspectos da informática, xunto co obxetivo de cada unha. Proporciónase material e instruccións para que o profesorado poida desenvolvelas nas aulas con alumnado de entre 9 e 14 anos. Cada docente readaptará cada actividade ó nivel educativo específico utilizando a metodoloxía didáctica que estime oportuna e, nalgúns casos, rebaixando os obxectivos e realizando algunhas das actividades propostas só parcialmente. En calquera caso, en cada actividade haberá algún comentario acerca da idade do alumnado. Ningunha das actividades vulnera a privacidade e intimidade do alumnado, nin do profesorado, que participan nelas.