Este proxecto comezou en 2016 cando a Oficina de Igualdade de Xénero (OIX) da Universidade de Santiago de Compostela (USC), en colaboración co Concello de Santiago de Compostela, puxo en marcha o programa “Unha enxeñeira ou científica en cada cole” para a realización de obradoiros científicos nos Colexios de Educación Infantil e Primaria (CEIP) públicos de Santiago. Grazas á responsable da OIX en 2016, Dra. Eva Aguayo Lorenzo, e a Dra. Encina Calvo Iglesias por invitarme a participar neste programa co obradoiro “Informática visual aplicada á bioloxía”.

Grazas a todas as nenas e nenos anónimos que, ó longo destes anos, coas súas preguntas e inquedanzas foron mellorando as actividades do obradoiro. Grazas ao profesorado de educación primaria e secundaria que me recibiu nas súas aulas, polas súas aportacións didácticas no desenvolvemento dos obradoiros da aula. Grazas tamén ó meu fillo Fuco e ás miñas fillas Gala e Leda polas súas preguntas, comentarios e críticas ó longo destes anos. No ano 2021, a OIX estende a iniciativa a todos os CEIP de Galicia. Este curso 2023-24, a responsable da OIX, Dra. Marta Pérez Pereiro, amplía o número de obradoiros. A documentación do obradoiro “A informática e a vida” que tedes nas mans é a evolución dese obradoiro inicial. Grazas á OIX da USC por invitarme a este novo reto, e ó Centro Singular de Investigación en Tecnoloxías Intelixentes da USC (CiTIUS)  por dar o soporte necesario para a distribución e difusión da documentación do obradoiro.

Neste obradoiro úsanse dous produtos de investigación, os programas CystAnalyser e STERapp. Quero agradecer a participación de todas as persoas que fixeron posible esta investigación: Adrián Cordido, Miguel A. García González, Manuel Fernández Delgado, Almoutaz Mbaidin, Sonia Rábade Uberos, Rosario Domínguez Petit, Andrés Villaverde, María Encarnación Gónzalez Rufino e Arno Formella.